Gör neçə vaxt keçib, sən gedən gündən,
O gündən bugünə yaman dolmuşam.
Ömür yollarımdan sən itən gündən,
Bir mesaj, bir zəngə həsrət qalmışam!
Oturub xəyallar qururam hərdən
Xəyallar başıma səpilib dən-dən
Biləsən, hələdə ürəyimdəsən
Can deyən səsinə həsrət qalmışam !
Kövrək mahnılarda qəlbi ovutmur,
Ürəkdə dirənib səni unutmur,
Bir kimsə, bir özgə yerini tutmur,
Sənin gülüşünə həsrət qalmışam !
Yoxluğun qəlbimi inlədir hər an,
Bu qədər daş ürək olarmı insan,
Üzülüb ümidlər, qalmayıb güman,
Bir sözlə mən sənə həsrət qalmışam !
1
